བྱང་རྒྱུད་ཁ་བའི་མཐའ་ནས་འཁྲུངས་པ་ཡི།།
འགྲོ་མི་སྤྱི་ལ་གསལ་བའི་འོད་པོ་ཆེ།།
རླབས་ཆེན་ཆོས་གོས་བསྣབས་ལ་གསོལ་བ་འདེབས།།
རྒྱལ་ཚོགས་མཉམ་འབྲེལ་གླིང་གི་གཤོག་སྣེ་ན།།
ནུབ་ཕྱོགས་སྟོབས་ལྡན་ཡུལ་གྱི་མདུན་སོ་ན།།
ཕྱག་ཟུང་སྙིང་ཀར་སྦྱར་བའི་སེར་མོ་བ།།
སྐྱེས་བུ་གྲགས་པ་ཅན་དེར་གསོལ་བ་འདེབས།།
ལོ་ངོ་དྲུག་ཅུ་བརྒལ་བའི་ས་མཐའ་ནས།།
དགུང་གྲངས་བདུན་ཅུར་སོན་པའི་ཚེ་མཐའ་ནས།།
ཕྱིར་མིག་གངས་ལ་འཁོར་བའི་རྒྱལ་ཁམས་པ།།
དུས་ཀྱི་ཕོ་སྐྱེས་གང་ལ་གསོལ་བ་འདེབས།།
ཞི་བའི་འཁར་གསིལ་ཕྱག་གིས་མ་དོར་ཞིང༌།།
བྱམས་པའི་མཆི་མ་སྤྱན་ལས་མ་གཡོལ་བའི།།
ནོལ་པེལ་རྟགས་མའི་གདན་གྱི་བསམ་བློ་བ།།
མི་ཡི་དཀོན་མཆོག་ཉིད་ལ་གསོལ་བ་འདེབས།།
ཕྱི་ནང་ཆོས་ཀྱི་མཐོ་ཞན་མ་བཞག་པ།།
རིང་ཐུང་རིགས་ཀྱི་ཐོན་ཁུངས་མ་བརྩད་པ།།
དེང་གི་བདེ་གཤེགས་མཆོག་ལ་གསོལ་བ་འདེབས།།
ཐུབ་པའི་རྩིས་ཐང་མངའ་བའི་རྒན་རབས་པ།།
དར་དམར་མཚོན་གྱིས་སྒུལ་བར་མ་ནུས་ཤིང༌།།
རྙིང་འཛིན་རྡུལ་གྱིས་གོས་པར་མ་གྱུར་པའི།།
རང་དབང་རང་བདག་སྦུབས་ཀྱི་ཁ་ལོ་བ།།
རྒྱལ་སྲས་དཀའ་བ་སྤྱོད་ལ་གསོལ་བ་འདེབས།།
ཕོ་བྲང་དཀར་བོའི་ནང་གི་གསེར་སྐུ་ཞིག།
པོ་ཏ་ལྭ་ཁང་ཕྱི་ཡི་སོ་སྲུང་ཞིག།
བློ་རྩེ་དབུ་མར་གནས་པའི་མཛད་སྤྱོད་པ།།
རང་སེམས་བཙོན་ལས་གྲོལ་ལ་གསོལ་བ་འདེབས།།
ལུས་ཀྱི་མཛེས་དབྱིབས་ལྷ་ལས་མ་སྤྲུལ་བ།།
ངག་གི་བདེན་གཏམ་ལྷ་ཡིས་བཟོས་མིན་པ།།
དགའ་སྐྱོ་གདོང་ལ་འབུར་བའི་སོ་སྐྱེས་པ།།
གཟུ་བོ་ཁུར་དུ་བཞེས་ལ་གསོལ་བ་འདེབས།།
ལྷ་སྲུང་བཟློགས་པས་འཆུགས་ཙམ་ཕྱིན་ན་ཡང༌།།
དཔོན་ནག་དྲུང་ནས་ཏོག་ཙམ་བསྒུར་ན་ཡང༌།།
རྒྱལ་སྤྱིའི་སྲིད་སྲུང་དབུས་ཀྱི་བློ་འབྱེད་པ།།
སྟོན་པ་བོད་དོན་སྨྲ་ལ་གསོལ་བ་འདེབས།།
ཤེས་རབ་བློ་ཡི་སྣང་བ་ཁོག་ནས་རྒྱས།།
ལྷན་གཤིས་ཚོར་བའི་སྙིང་སྟོབས་གདན་ནས་འབར།།
རྒྱལ་ཕམ་སྲོག་འདུའི་བར་གྱི་བརྟུལ་ཕོད་པ།།
ཡུལ་གྱར་དཔའ་བོ་གང་ལ་གསོལ་བ་འདེབས།།
མདོར་ན་ལམ་གྱི་རིང་ཐུང་མི་བརྩི་བར།།
མདོར་ན་མིག་གིས་མཐོང་མིན་མི་ལྟོས་པར།།
ཁྱེད་ནི་ང་ཡི་སྲོག་གི་བདག་པོ་དང༌།།
ང་ནི་ཁྱེད་ཀྱི་བརྩེ་བའི་བུ་ཕྲུག་ཡིན།།
རིགས་ལ་གཡོ་སྐྱོམ་འོང་དུས་ཁྱེད་ལ་འབོད།།
སྒེར་ལ་འཚོ་བས་བཅུམ་དུས་ཁྱེད་ལ་འབོད།།
ནང་མིས་སྙོན་འཛུགས་གཏོང་དུས་ཁྱེད་ལ་འབོད།།
ཕྱི་མིས་བཙན་འཛུལ་ཐེབས་དུས་ཁྱེད་ལ་འབོད།།
ཁྱེད་ལ་འབོད་པ་ཁྲི་འབུམ་ཡོད་སྲིད་ཀྱང༌།།
གསོལ་འདེབས་ཁྲག་དང་སྦྱར་ཏེ་ཁོ་བོས་སྐུལ།།
ཁྱེད་ཉིད་མཇལ་ཙམ་བརྒྱ་སྟོང་ཡོད་འདུག་ཀྱང༌།།
རྒྱུ་མཚན་དོན་གྱིས་རྙེད་དེ་ཁོ་བོས་ལྟ།།
2010/06/12ཉིན།
No comments:
Post a Comment
མཆན་འགོད་ཡུལ།